近7交手6開半W
周三凌晨歐聯16強次回合大戰，力爭4連霸嘅皇家馬德里返回主場再鬥阿積士。皇馬近日於本土賽事頻頻失利，惟有將捧盃希望放喺歐聯，「銀河艦隊」首回合僅贏2比1，晉級未算穩陣，為免夜長夢多，皇馬今場肯定開波即搶攻，半場主勝捧得過。
（Now 644、有線662及602台周三凌晨4時直播）
繼西班牙盃兩回合以1比4遭死敵巴塞淘汰之後，皇馬上仗聯賽再以0比1輸畀巴塞，重奪聯賽冠軍幾乎無望。連續兩場「國家打吡」失利，肯定嚴重觸動皇馬高層同球迷嘅神經線，所以皇馬領隊蘇拿利為保住帥位，嚟緊肯定會出盡法寶力爭歐聯錦標。
「銀河艦隊」首回合作客靠賓施馬同馬高阿辛斯奧嘅入波搶得先機，不過失咗1球，所以優勢唔算太大，今場喺隊長兼後防主力沙治奧拉莫斯停賽情況下，皇馬開局肯定改打進攻足球。其中連續兩場「國家打吡」正選上陣嘅巴西小將雲尼斯奧斯祖利亞表現搶眼，已經證明自己有能力應付歐洲嘅高水平賽事，有佢喺前場發難，主場出擊嘅皇馬可望半場取得領先，主導比賽。
客軍新仔輸經驗
作客嘅阿積士雖然有荷蘭超新星法蘭基迪莊坐鎮中場，不過呢支荷甲勁旅以年輕球員為骨幹，歐洲賽經驗比較輸蝕，嚟到歐聯淘汰賽階段肯定更加緊張，更重要係阿積士防守唔算穩陣，近6場作客事有5場出現失波，今場難望保住清之身。睇番對賽往績，阿積士近年面對皇馬都冇啖好食，近7次歐聯交手輸晒之餘，其中6次半場已經落後畀「銀河艦隊」，今場作客大有可能半場都頂唔住，皇馬半場主勝有1.95倍值博。