普巴停賽斷紅魔經脈
周四凌晨續演兩場歐聯16強次回合，重頭戲巴黎聖日耳門（PSG）主場硬撼「紅魔鬼」曼聯。紅魔鬼首回合主場輸0比2，想晉級今場必須主動搶攻，可惜佢哋現時受到傷停問題困擾，陣容嚴重不整；從首回合所見，PSG無論隊型、默契及經驗皆遠勝紅魔，返主場有力再贏多鋪，PSG讓一球照捧上盤。
（Now 643、有線616及656台周四凌晨4時直播）
曼聯大半隊主力傷晒
曼聯首回合輸波事小，中場靈魂保羅普巴末段領紅牌搞到今場停賽先係事大。自從蘇斯克查出任看守領隊後，呢名法國中場近16場個人射入9球並交出7次助攻，冇咗佢等如斷咗紅魔鬼嘅進攻命脈，要知道紅魔今場至少要入2粒，晉級先有價講，而且幾名攻擊好手包括安東尼馬迪爾、連格及桑馬達亦有傷在身，至於阿歷斯山齊士觸傷左膝韌帶，估計要養傷兩個月，今季或提早收咧。因此就算盧卡古近期腳風轉順，單憑佢同拉舒福特攻堅，實在畀唔到人信心。
除咗鋒力不足，曼聯中後場亦有唔少傷兵，防守中場尼曼查馬迪肯定倦勤，安達靴里拉、路爾斯華倫西亞及菲爾鍾斯亦有傷在身，上場聯賽對修咸頓險勝3比2已睇到有唔少漏洞，今次對住攻力更強嘅PSG相信更難招架。
卡雲尼復出火力更勁
PSG首回合雖然缺少尼馬及卡雲尼，但由基利安麥巴比、迪馬利亞、達斯拿組成嘅攻擊組合，仍然搵到唔少機會插入曼聯防線嘅心臟地帶，默契及級數明顯勝一籌，其中基利安麥巴比近5場有份上陣比賽皆有士哥，個人轟入7球，狀態弗爆，據報卡雲尼今仗有機會復出，勢令PSG進攻如虎添翼，除咗PSG上盤之外，大盤亦係唔錯選擇。