今晚續有歐聯16強次回合，先講冇咁受人關注嗰場，就係波圖主場迎戰羅馬，我比較睇好波圖可反勝晉級，何解呢？雖然首回合佢哋先輸1比2，但取得1個極為重要嘅作客入球，今仗只要贏1比0就可出線。
睇番呢支葡超勁旅於日前聯賽硬撼死敵賓菲加，踢到就住就住，最終反輸1比2，可見佢哋已將全副心機放晒喺收入更豐厚嘅歐聯賽事上。另一邊廂，羅馬一向係海鮮波，上屆可以喺8強淘汰巴塞隆拿，但今屆分組賽對住柏辛域陀尼亞都輸得，加上揸住1球領先優勢並唔穩陣，如果改踢佢哋唔擅長嘅守勢波，隨時作繭自縛，波圖有力絕地反勝。
曼聯出線得兩個可能
相反，首回合在主場淨輸0比2嘅曼聯，今仗作客再鬥巴黎聖日耳門（PSG）想出線，真係要靠奇迹或神明打救。一來首回合PSG冇尼馬同卡雲尼都贏得咁輕鬆，淨係一個基利安麥巴比就玩殘曼聯防線，就算今仗前兩者唔出得都未驚過；二來紅魔亦傷兵滿營，中場核心保羅普巴更要坐波監，需知道看守領隊蘇斯克查帶隊後翻生，與普巴大爆發有關，今仗冇咗呢位進攻泉源，曼聯欲反勝晉級，機會只得兩個──渺茫同冇機會。