艾美利唔妥雷恩賓艾化
周五凌晨歐霸16強首回合，英超倫敦雙雄分途出擊，其中阿仙奴將會作客面對法甲球隊雷恩。兵工廠今季喺歐霸專家艾美利帶領下，一路高歌猛進，加上奧斯爾復出後表現大受好評，有力帶領阿仙奴喺客場先拔頭籌，1.8倍客勝捧得過。
（Now 643、有線616及656台周五凌晨1時55分直播）
阿仙奴領隊艾美利同雷恩球星賓艾化有牙齒印，兩人昔日喺巴黎聖日耳門共事期間結怨，最終搞到不歡而散，今場比賽焦點好自然落喺兩人身上。兵工廠射手拿卡錫迪要繼續坐波監，不過仲有奧巴美揚擔起入球重任，加上德國中場奧斯爾復出後狀態夠弗，面對過於依賴進攻核心賓艾化嘅雷恩，兵工廠絕對有力於首回合反客為主，客勝值博。
車路士鬥基輔捧大盤
晏少少開波仲有車路士主場鬥基輔戴拿模，車仔雖然近期受門將阿列沙巴拿加拒絕離場事件影響，不過一眾球員大打爭氣波，整體發揮不跌反升，尤其進攻特別有計，加上前鋒基奧特踢親歐霸盃都零舍醒神，今場如果有機會上陣，為證身價肯定博到盡。查實車仔近期出戰歐霸火力都夠猛，近4仗歐霸每場都入2球或以上，總入球全開3球或以上，今場入球大細中位數2.5球，入球大咪走寶。
（Now 643、有線616及656台周五凌晨4時直播）