留力歐聯半場搶爆烏甸
今晚意甲獨腳戲，「1哥」祖雲達斯主場迎戰烏甸尼斯。祖記嚟緊周中有歐聯生死戰，今仗必定玩速戰速決，好讓C朗等主力早啲休息，而且「斑馬兵團」近期聯賽初段零舍搶韁，加上仲有「烏甸剋星」保羅戴巴拿助陣，今仗可速食對手，1.61倍半場主勝更值得捧場。
（Now 638及有線654、614、662、602台周六凌晨3時30分直播）
近年壟斷意甲嘅祖記，早已將目標劍指歐聯，但喺今屆16強首回合作客馬德里體育會先輸0比2，下周中則會進行次回合，為晉級非勝不可，眼見今個周中曼聯同阿積士喺歐聯點樣絕地反擊，相信祖記唔會輕易放棄。而為免喺大戰前夕增添傷兵，以及畀時間一班主力養精蓄銳，因此必定希望今場初段入多幾粒，早早鎖定勝局，下半場就可換走部分主力備戰歐聯生死戰。
烏甸防線怕咗戴巴拿
雖然烏甸近排有啲起色，但只限於主場出擊，佢哋近8場作客只得3和5負，當中有5場比賽更加食白果，依家仲有中場主力文拿高拉坐波監，實力弱上加弱。祖記除咗王牌C朗弗爆之外，另一前鋒保羅戴巴拿更係「烏甸剋星」，呢位上月當選祖記最佳球員嘅阿根廷射手，近6次對烏甸入咗6粒，預計今仗又係佢表演機會。睇番近況，祖記出戰聯賽甚為搶韁，近5場聯賽有4次喺上半場就取得領先，半場主勝有計。