記掛歐聯快刀斬亂麻
今晚英超壓軸尾場，重登榜首嘅「藍月亮」曼城，喺主場硬撼「大黃蜂」屈福特。曼城贏到開巷弗到震，而且比「2哥」利物浦早一日比賽，若果贏波就可給以畀爭標勁敵更大壓力，加上近年面對「大黃蜂」例多波入，中位數3.5球照捧入球大。（Now 621周日凌晨1時30分直播）
從上年12月尾突然走樣2連敗、一度落後利物浦7分嘅曼城，憑之後嘅10場聯賽豪取9勝1負佳績，其中8場喺上半場已領先，得以反壓頻頻失分嘅「紅軍」1分升番上榜首，唔講得笑，「藍月亮」喺逆境下盡顯強大心理質素。雖然中場奇雲迪布尼喺上仗險勝般尼茅夫1比0之役傷出，但入替佢嘅馬列斯正正攻入致勝士哥，反映出佢哋板櫈深度堅充足。
馬列斯表示比「紅軍」早一日比賽，當贏波後明顯帶來優勢，並將壓力加諸於勁敵上，上周正係曼城先贏般茅，而之後一日利物浦在重壓之下被愛華頓悶和0比0，得以重返榜首，今輪又係「藍月亮」先比賽，一定搏盡贏波。
屈福特遇強即屈
屈福特今季表現唔錯，可惜遇強即屈，近8次面對Big 6球隊，只得1勝7負，見到都唔開胃。翻查紀錄，兩軍近4次碰頭，曼城唔單止贏晒，有3次總入球達4球或以上，仲由頭贏到尾，加上「藍月亮」喺周中有歐聯16強次回合對史浩克04後顧，必想大勝一仗振聲威，大盤值得捧場。