利物浦一向恨攞英超冠軍，今季一開咧亦立即帶出，上年12月尾甚至喺打多1場下拋離曼城10分咁多，點知踏入2019年後忽然跌Watt，未計今輪賽事，已被曼城從後趕上，落後「藍月亮」1分，短短過咗只係2個多月，即優勢盡失，何解呢？
今砌般尼成敗轉捩點
紅軍喺主帥高普麾下，採用高壓迫打法，對體能消耗極大，不過英超仍未有歇冬期，球員未有充足時間回氣，表現一定大打折扣。成季流流長，每隊都會出現低潮，但紅軍跌入谷底時，正值曼城弗爆瘋狂搶分，此消彼長下，「藍月亮」三扒兩撥就追番上嚟。最關鍵之役，梗係1月頭利物浦作客以1比2輸畀曼城，被破今季聯賽不敗身，嗰場曼城主帥哥迪奧拿罕有地改踢緊密防守戰術，縮後迎敵打反擊，成功打窒紅軍勢頭，
之後其他球隊亦照辦煮碗，因此利物浦對李斯特城（1比1）、韋斯咸（1比1）、曼聯（0比0）、愛華頓（0比0）都失分。同時，紅軍季初狀態大勇，除咗防線穩固外，前線三箭頭穆罕默德沙拿、羅拔圖法明奴及沙迪奧文尼亦火力全開，過於倚賴佢哋數胡，不過沙拿近期狀態低沉，法明奴又受傷，加上一眾中場球員入球能力欠佳，呢點亦係致命傷。
毫無疑問，紅軍依家處於低潮，今晚主場迎戰般尼，高普究竟有乜法子去激勵眾將迎難而上，隨時成為今季成敗轉捩點。