今日阿King將焦點放喺晏晝日本波，重心推介日職直播賽事，力爭3連霸嘅川崎前鋒作客鬥橫濱水手；前鋒開季未上力，對住兩連勝嘅水手冇本錢讓波，水手受讓平半必捧下盤。（有線602及662周日下午1時直播）
上季鬥到煞科日先至護級成功嘅水手，今季表現大躍進，頭2輪聯賽先後擊敗大阪飛腳及仙台維加泰，當中新兵艾迪加祖尼奧個人入3球，表現對辦；前鋒今季須要兼顧亞冠盃，今場係佢哋23日內第5場比賽，上周佢哋喺亞冠盃分組賽0比1輸畀上海ＳＰ，嚟緊周中又要再鬥ＦＣ悉尼，對一班年過30嘅主力包括小林悠、家長昭博及中村憲剛嚟講絕對唔易啃，何況佢哋頭兩場聯賽分別打和ＦＣ東京及鹿島鹿角，表現明顯未上力，疲兵出戰仲要作客讓平半，水手下盤咪走寶。
串維加泰細市原大
另一場日職由神戶勝利船作客鬥仙台維加泰。勝利船雖有韋拿、恩尼斯達及普多斯基3大球星壓陣，不過整體配合仲要改善；維加泰主場一向夠硬淨，今季聯賽首戰便以0比0摸和實力不俗嘅浦和紅鑽，揀2.5球入球細。最後一關係日乙千葉市原主場鬥山口雷法，兩軍今季同樣未開齋，千葉市原上季42場聯賽入72球、失72球，踢法有前無後；山口雷法開季兩連敗，同對手加埋一共入10球，2.5球大盤捧得過。