周一凌晨美職東岸大戰，紐約城主場火併華盛頓聯隊。紐約城放走射手韋拿後火力不減，華盛頓聯隊喺前英格蘭國腳朗尼領軍下，表現大熟大勇，有力反客為主，兩軍近年交鋒常演入球騷，首選入球大。
（周一凌晨3時開賽）
紐約城今季雖有首席射手韋拿轉投日職球隊神戶勝利船，但上季常規賽加埋入咗25球嘅麥斯摩拉利斯、達祖尼及捷西斯麥甸拿仍在陣中，進攻火力未見減弱，不過紐約城首戰作客上季東岸常規賽包尾嘅奧蘭多城，領先2球下被對手逼和2比2，防守上仲有唔少地方要改善。
朗尼幫華盛頓聯升呢
華盛頓聯隊上季加入前英格蘭國腳朗尼後，由東岸弱旅搖身一變成為季後賽分子，今季聯賽首戰於主場更以2比0擊退上季總冠軍阿特蘭大聯，足證經過半季磨合，球隊發揮更上一層樓。兩軍近6次聯賽交手一共合力炮製22球，5次總入球達3球或以上，今場大細中位數開2.5/3球，入球大係投注首選；唔只咁，華盛頓聯隊近6次鬥紐約城有5次先開紀錄，第一隊入球亦可敲客隊。