王牌C朗恰慣馬體會
周三凌晨歐聯16強次回合焦點大戰，祖雲達斯返到主場再鬥馬德里體育會。意甲1哥祖記首回合淨吞兩蛋，呢場肯定全力反攻，其中「老婦人」王牌基斯坦奴朗拿度（C朗）不嬲都係馬體會剋星，呢場有佢壓陣，祖記主場出擊有力取勝，肯定揀主勝。
（Now 644、有線602及662台周三凌晨4時直播）
連續7屆稱霸意甲嘅祖記，以往攞聯賽攞到手軟，今季只有捧起歐聯冠軍，先至可以滿足到「老婦人」嘅野心。呢支意甲班霸近幾屆歐聯多次打入淘汰賽最終階段，可惜都飲恨而回，今屆佢哋於16強再次遇到難關，首回合爆冷以0比2輸波，呢場球隊肯定做好背水一戰嘅準備。祖記今季高調引入C朗，無非就係想靠呢位上屆歐聯神射手嘅超班入波能力取勝，上仗聯賽佢同基亞連尼、文迪蘇傑等主力齊齊免戰抖到足，就係為咗養精蓄銳搏呢場，況且這位葡萄牙國腳專剋馬體會，過往效力皇家馬德里時曾經22度轟破對手大門，包括7次於歐聯淘汰賽碰頭攻入4球，呢場隨時再有好戲上演。
馬體會兩主將坐波監
而且馬體會喺鐵帥施蒙尼帶領下，一向擅於防守，呢場拎住兩球喺手，仲有中場湯馬士柏迪同箭頭迪亞高哥斯達齊齊坐波監，作客嘅馬體會肯定死守，變相將進攻主動權讓咗畀祖記。查實面對主場強勢嘅「老婦人」，今季作客來訪擺鐵桶陣嘅球隊又點只馬體會，不過就算係咁，祖記依然有唔少板斧攻破重重防線，相信經驗更勝一籌嘅祖記有力係主場贏番一仗。