歐聯16強次回合壓軸兩仗，其中巴塞隆拿返主場再鬥里昂。首回合打和0比0，巴塞一向火力全開，呢場睇落好似殺聲震天，但佢哋打歐聯又係另一個樣，變得穩打穩紮，隨時贏波即收韁，估計入波都係一、兩球上落。
近5仗歐聯只入6球
巴塞返主場出擊，理所當然獲秤先，但睇番死敵皇馬點樣陰溝裏翻船，「地上最強」都不宜太老定。儘管巴塞坐擁美斯、蘇亞雷斯、奧士文尼迪比利等進攻好手，但主帥華爾維迪係穩陣派，尤其係出戰歐聯賽場，單計近5仗歐聯總計只係入得6球，同大家印象中火力全開、閒閒哋贏3、4球嘅巴塞截然不同。最重要係巴塞未有取得作客入球，若果今仗唔覺意畀里昂入波，就會陷於被動，華帥最想梗係入波先，然後玩拉布拖到完場，應該好難有大量入波睇嘞！
另一場拜仁慕尼黑主場對利物浦，首回合同樣係0比0，今鋪拜仁返主場會採取主動，反而啱晒紅軍打反擊，需知道一旦紅軍入波，最終打和亦有作客入球優勢，相信主帥高普會落柯打，以「保不敗」為目標，再伺機給予致命一擊。