紅軍當黑訪凶地
今晚歐聯16強次回合爆發重頭大戰，利物浦作客硬撼拜仁慕尼黑。紅軍雖有中堅華基爾雲迪積克刑滿復出，但王牌穆罕默德沙拿連續5場食白果，黑到冇朋友，而且近期歐聯客場出擊例必腳軟，今場造訪回勇兼主場專治英超兵嘅拜仁，睇怕凶多吉少，拜仁小讓平半，上盤有計。
（Now 643、有線656及616台周四凌晨4時直播）
利物浦喺首回合佔盡上風，卻只能喺主場與拜仁打成0比0，絕對係放虎歸山。防線領袖華基爾雲迪積克雖然坐完波監可復出，但呢支上屆歐聯亞軍近期狀態大幅滑落，近8場只得3勝5和，仲喺英超畀曼城過咗頭跌落「2哥」位，嚴重打擊信心。忽然大跌Watt，同王牌穆罕默德沙拿腳風欠順有關，佢近5場全部食白果，而且喺大戰例牌隱形，今季英超兩戰曼聯、曼城、火併車路士及熱刺、歐聯鬥巴黎聖日耳門合共8場比賽，錄得零入球，同上季遇強愈強相比，判若兩人。
羅拔仔占士基拿比擦出火花
相反，拜仁歇冬後狀態冒升，近6場5勝1和，包括上場以6比0狂炒禾夫斯堡，喺德甲已追至與榜首多蒙特同分，前線新組合羅拔利雲度夫斯基、占士洛迪古斯及基拿比愈來愈合拍，「羅拔仔」剛以197球成為德甲史上入波最多嘅外援，弗到漏油。即使今場有右閘甘美治停賽，幸翼鋒列貝利、京士利高文及中場哥列斯卡已傷愈可候命，上周被德國國家隊棄用嘅3子湯馬士梅拿、謝路美保定及曉姆斯，更會化悲憤為力量，喺拜仁踢爭氣波證明自己。
翻查紀錄，紅軍喺歐聯作客表現慘不忍睹，連續4場歐聯作客全敗之餘，當中更包括造訪貝爾格萊德紅星淨吞2蛋，相反，拜仁近4次歐聯主場迎戰英超球隊，全部贏晒，睇嚟專剋英超兵，今仗小讓平半，上盤咪錯過。