另一支倫敦球隊車路士，喺今晚歐霸16強次回合作客基輔戴拿模。車仔首回合淨勝3蛋，出線機會高唱入雲，留力聯賽爭前4好過，今仗只求穩穩陣陣保住優勢過關，基輔受讓當然捧1.75倍讓球主勝。
（Now 643、有線656及616台周五凌晨1時55分直播）
車仔憑柏度洛迪古斯、韋利安及新仔赫臣奧杜爾各省1粒，喺首回合主場贏3比0，晉級可謂坐定粒六，反而喺日前聯賽只能逼和狼隊1比1，依家打少1場下落後「4哥」阿仙奴3分排第6位。雖與熱刺、阿仙奴同曼聯積分差距唔大，但爭前4嘅形勢相對被動，就算捧歐霸亦可取得歐聯入場券，不過現階段冇可能咁快放棄爭前4；既然領先緊基輔3粒，車仔今仗收起夏薩特等主力，留力聯賽唔奇。
留力英超爭前4
基輔雖有比華歷、法蘭蘇爾及舒比利夫受傷患困擾，但前鋒哈馬殊於日前聯賽梅開二度，狀態唔錯，而且主場出擊點都唔想衰多鋪。何況車仔近2次作客烏克蘭，只得1和1負未贏過，加上心繫爭聯賽前4，今仗例行公事只求保住優勢過關，唔會踢得特別搏命，藍戰士今場冇本錢讓波，寧捧讓球主勝。