首回合落後兩粒絕地反攻
周五凌晨歐霸16強次回合激戰連場，其中阿仙奴會主場再鬥雷恩。兵工廠首回合輸1比3，想晉級已經冇退路，惟有豁出去搶攻，加上球隊歐霸主場出擊踢法向來搶韁，1.57倍阿仙奴半場勝有計。
（Now 643、有線616及656台周五凌晨4時直播）
首回合阿仙奴雖然一度領先，靠伊禾比先拔頭籌，不過完半場前中堅柏柏斯達夫普路斯兩黃一紅被逐，令兵工廠陷入被動，成為賽事轉捩點，打少個之下最終以1比3落敗。
雷恩守勢波唔易捱
賽前好消息係原本要停賽嘅主力前鋒拿卡錫迪，成功打甩額外處分，今場可以披甲上陣，有佢拍住近期狀態回勇嘅奧斯爾，阿仙奴前場攻力肯定大大提升。而且兵工廠主場出戰歐霸頻頻搶頭威，近4仗歐霸主場有3次半場都取得領先優勢，挾住啱啱喺聯賽擊敗曼聯嘅威勢，領隊艾美利必號令球員開賽立即主動搶攻。
雷恩首回合交手喺大部分時間人數佔優嘅情況下，成功搶得先機，其中王牌球星賓艾化搶盡風頭，喺昔日一起於巴黎聖日耳門共事兼結怨嘅艾美利面前大踢爭氣波，賽後仲話自己好開心見到艾美利喺場邊嘅焦急樣。如今攞住2球領先優勢，雷恩今場隨時退守後防，但唔知頂得幾耐，況且阿仙奴於聯賽前4爭奪處於下風，為保證攞到下屆歐聯入場券，肯定唔會輕易放棄歐霸冠軍呢條後路，戰意有保證。兵工廠領隊艾美利上仗畀賓艾化寸到飛起，今場返到主場為復仇，肯定要班球員落力搶攻，半場主勝捧得過。