奪標大熱門曼城作客鬥英冠史雲斯，「藍月亮」曼城今季目標直指「四冠王」，就算面對低別組對手亦唔會放軟手腳，不過「天鵝」史雲斯對上3圈英足盃皆以大比數勝出，攻力有番咁上下，曼城作客讓兩球、兩球半太辣，改捧3.5球大盤仲划算。
（周日凌晨1時20分開賽，馬會網上文字直播）
喺英超領導群雄嘅曼城早前已經率先捧走英聯盃，加上周中歐聯16強次回合以7比0大炒史浩克04，兩回合計贏10比2進身8強，有機會史無前例單季獨攬4大錦標。曼城領隊哥迪奧拿早前曾經講過，佢哋唔會放棄任何錦標，因為「藍月亮」歷史背景唔及巴塞、皇馬、曼聯或利物浦等傳統大球會，捧盃次數遠遠不及，因此每個冠軍對曼城嚟講同樣咁重要，所以球隊唔會揀波踢。
睇番曼城今屆晉級過程，對上3圈先後7比0狂數洛達咸、5比0大炒般尼、4比1擊敗紐波特郡，3場加埋入咗16球，過程完全冇放軟手腳，更何況以目前曼城嘅板凳深度，就算陣容輪換，戰鬥力都唔會相差太遠，等閒球隊好難招架。
史雲斯對賽慣性鬥攻
史雲斯現排英冠第15位，既無機會爭升班，護級壓力亦不大，今場冇心理包袱下可放手一搏。史雲斯於今屆英足盃晉級路途從未遇過英超兵，但之前3圈合共轟入11球，鋒力相當不俗，而且史雲斯未降班前，近4次於英超鬥曼城有3次開4球或以上，而且單計主場，史雲斯最近6次鬥曼城亦只有1次交白卷，經常合演對攻好戲，既然大細中位數3.5球有1.85倍，不如改捧入球大仲穩陣。