曼聯喺英足盃8強同樣要作客，佢哋將會南下英國中部鬥狼隊。「紅魔鬼」自看守領隊蘇斯克查接手後，曼聯近10場作客搶得9勝，近5場英足盃作客更加全勝；狼隊對Big6球隊偶有佳作，但主力射手魯爾占美尼斯對親曼聯都入唔到波，曼聯今場有力喺法定時間贏波，小讓平半，上盤值得支持。（周日凌晨3時55分開賽）
現時仍然要聯賽、歐聯及足總盃3線作戰嘅曼聯，中前場傷兵陸續康復，縱然今場有艾殊利楊格停賽，球隊仍然有足夠板櫈深度畀蘇斯克查調動。
曼聯上場聯賽以0比2作客不敵阿仙奴，蘇斯克查首次於本土賽事落敗，但其實曼聯落後0比1後有不少扳平機會，如非欠缺球運加上對方門將賓特尼奴演出神勇，最終未至於淨吞兩蛋。最緊要係，與早前歐聯16強首回合不敵巴黎聖日耳門後一樣，蘇斯克查於輸波後態度正面，預計呢場敗仗對曼聯信心影響不大。
曼聯讓平半抵玩
狼隊今季鬥Big6時有好表現，包括英足盃主場以2比1淘汰利物浦，但利記該仗起用不少副選，實力打折，況且列強對狼隊嘅穩守突擊踢法已有一定了解，變相令狼隊更難「偷雞」。狼隊今季最弗球員首選係魯爾占美尼斯，呢名賓菲加借將聯賽射入12球，英足盃亦射入2球。不過呢名墨西哥前鋒之前曾經3次對過曼聯，包括聯賽首循環以及上季仲踢緊賓菲加歐聯時兩鬥曼聯，全部都入唔到波。少咗呢把尖刀支援，狼隊好難同曼聯抗衡，紅魔鬼讓平半上盤極之抵玩。