奧格斯堡主場勢攞威
德甲護級大戰，奧格斯堡主場迎戰漢諾威，奧格斯堡近期全面回勇，接連喺強隊身上得分，今仗仲有多名傷兵可以復出，有條件大勝氣數已盡嘅漢諾威，讓球盤奧格斯堡讓半一超低水冇肉食，黑柴貪心啲，博有2.42倍嘅讓球主勝。
（on.cc東網周六晚10時30分直播）
奧格斯堡現時排聯賽榜尾4，佢哋本身實力唔係咁差，可惜季中長期受嚴重傷兵問題困擾，搞到成績下滑要護級，不過近期佢哋大踢爭氣波，先係主場憑池東沅包辦兩個入球，爆冷贏咗一哥多蒙特，上輪又作客頂住三哥RB萊比錫強攻，力保不失搶番一分，能夠喺呢兩場硬仗成功搶分，成隊波士氣好到加零一，今仗賽前仲接連收到好消息，陣中3大主力包括首席射手艾費特芬保加臣、防線領袖古維利奧同中場校炮嘅莫拉域克齊齊傷愈復操，康復進度理想，今仗復出機會樂觀，有番呢幾位領袖助陣，奧格斯堡整體實力大幅回升，由於佢哋只係領先尾3嘅史特加3分，仍然有搶分壓力，今場務必要擊敗實力次一皮嘅漢諾威，護級至可以鬆一口氣。
漢諾威防線曳難翻身
漢諾威計實力同狀態可以話目前德甲最差一隊，近8場聯賽輸咗7場，近4仗每仗最少都失3球如不設防，已經成為降班鐵膽。雖然上輪主場對利華古遜力戰下輸2比3，表面睇係近期最似樣一仗，但要留意該役喺大雪中進行，場地根本唔適合比賽，搞到利華古遜球員無法發揮技術同組織，相反漢諾威擺雙箭頭一味空襲，至可以入到兩球波，但最終搏到抽筋都無法搶得分數，實在非常氣餒，日本前鋒原口元氣仲有一次射空門因為白界前積雪啜實個波搞到開唔到齋，黑仔到暈。今晚冇埋主場之利，佢哋今季作客12戰未贏過共失34球，陣中仍然傷兵滿營，到訪奧格斯堡凶多吉少。