施丹回歸 重新上彈
今晚西甲矚目戰，名帥施丹重掌「銀河艦隊」帥印後第一炮，皇家馬德里主場迎戰切爾達。皇馬今季動蕩不安，搞到要「翻撻」施丹穩定軍心，今場對住近況低迷嘅切爾達，眾將肯定全力搶頭威，讓球主客和「-2」照捧主隊！
（Now 632周六晚11時15分直播）
夠威望平息更衣室內亂
施丹領軍功力唔使多講，單係締造歐聯3連冠已經上晒神枱，不過佢上季季尾後不滿球隊現狀，毅然急流勇退，「銀河艦隊」今季同時冇咗C朗同施丹後即時「沉船」，西盃及歐聯出局，聯賽亦大幅畀死敵巴塞拋離，洛佩特吉同蘇拿利先後敗走帥位，面對球會空前困境，會長皮里茲惟有硬住頭皮搵施丹出山，更賦予「丹爺」前所未有大權。
查實歐聯出局後，皇馬內部迅速陷入四分五裂慘況，亦只有施丹嘅威望，先平息到更衣室內亂。佢首課操練就向球員落柯打，講明要有尊嚴咁完成今季賽事。當中今季不獲重用嘅艾斯高同基羅拿華斯等人，有望重新上位，隊長沙治奧拉莫斯亦坐完波監復出，肯定希望喺巴拿貝踢番場爭氣波。
切爾達現時排尾3護級水深火熱，自然想有分落袋，可惜佢哋近11仗聯賽輸9場，加上隊長伊亞高艾斯巴斯仲因傷繼續倦勤，根本難同皇馬周旋。佢哋近5次聯賽作客皇馬全敗，其中4次輸3球或以上，今晚注定又大敗而回。