周一凌晨意甲壓軸好戲，AC米蘭於掛名主場同國際米蘭上演打吡戰。暫列第3嘅AC僅領先第4嘅國米1分，為鞏固前4位置，兩隊都不容有失，加上近年「米蘭打吡」開局戰況膠着，換邊前難分勝負，半場和屬不二之選。
（Now 638、有線602、614、654及662台周一凌晨3時30分直播）
藍黑兵團殘陣唔敢亂攻
啱啱喺歐霸16強止步嘅國際米蘭，近期飽受傷病問題困擾，除咗主力前鋒莫路伊卡迪長期缺陣，嚴重影響球隊火力之外，上場聯賽迎戰史帕爾再有克羅地亞中場波索域拉傷大腿肌肉，以及中堅祖奧米蘭達撞爆鼻，今場大戰肯定缺陣，加上中場尼恩高蘭都有傷上陣成疑，陣容嚴重不整，相信「藍黑兵團」呢場都唔敢冒進，實行以守代攻。
AC米蘭今場有瑞士後衞列卡度洛迪古斯坐完波監可以復出，「紅黑兵團」自冬季轉會窗買入波蘭射手比亞迪克之後，前場進攻效率大幅提升，可惜開局慢熱嘅問題依舊，近5場有4次換邊前都同對手打和，包括上場聯賽半場就畀聯賽包尾大幡基爾禾逼和。
況且，兩軍近年出戰「米蘭打吡」都入局較慢，近3次交手上半場都打和，預計雙方呢場初段都會謹慎行事，半場和值得再追。