護級豁出去Vs衝冠搏命追
英超進入最後直路，爭標同護級形勢同樣激烈，第二位嘅利物浦暫落後曼城1分，未來8仗場場都要當決賽踢，至於尾二嘅富咸逐漸被放甩，踢法上早已豁出去同你搏命，兩隊目標鮮明，今場開大機會高，樂比捧3/3.5球大盤。
（Now 621周日晚10時15分直播）
富咸今季已先後用過三位領隊，嚟到看守領隊柏加，管理層嘅意思明顯不過，就係畀呢位冇乜經驗嘅少帥放手一搏，反正護級機會唔大，倒不如兵行險着，睇吓會唔會有奇迹出現。
其實柏加上任以來兩仗表現唔錯，起碼畀人感覺係球員拚搏，精神可嘉先，雖然最終分別以1比2不敵車仔同埋1比3輸畀李斯特城，但主要問題係條豆腐防線太軟弱，進攻其實算交到貨。
富咸失68球英超最多
事實上，富咸前線不乏好手，甚至可以話係英超中下游球會都希望擁有嘅可靠前線，阿歷山大米祖域絕對稱得上係一名全面射手，賴恩巴布，舒賀爾尼實力猶在，加上新秀賴恩施斯隆嘅衝勁，前線入波唔成問題，最得人驚嘅係防線，今季失68球係英超之冠，後防由右至左表現冇個合格，今季主場僅得對包尾嘅哈特斯菲爾德冇失波。
至於利物浦唔使多講，進入最後直路基本上開行turbo，雖然計近況紅軍略有回落，但由榜首跌番落次席壓力稍減，後上對佢哋嚟講發揮會更佳，力爭神射手嘅穆罕默德沙拿近期入球略減，不過拍擋沙迪奧文尼入球停不了，近8場聯賽入8球，雖然賽前話佢有少少傷，不過利記前線仍有法明奴，奧歷治，史杜列治等人，即使輪換影響亦未必大，上場聯賽喺落後嘅情況後反勝般尼4比2，今場隨時又會出現類似嘅大手交易場面。