英超球隊認真威水，喺今屆歐聯及歐霸8強都有Big 6球隊份，係自1970-71年度球季後，首次有6支英格蘭球隊喺單屆同時進身各項歐洲賽8強，難怪個個都話英超盛世，前幾屆嘅危機論一掃而空，兩項盃賽共16個席位，英超佔咗6個都拎唔到其中一項錦標，就真係無謂賭喇。
先講歐聯8強，曼城要硬撼熱刺，肯定有1支英超球隊可殺入4強，而利物浦只係對波圖，應該依絲W，雖然曼聯要火併「地上最強」巴塞隆拿，但以蘇斯克查領軍後帶來嘅運數，同埋巴塞與昔日巔峰時期仍有唔少距離，我覺得紅魔絕對有力一戰，並非外界睇得咁悲觀。
車路士應重歐霸輕前4
至於歐霸8強，阿仙奴抽到對拿玻里無疑係惡戰，不過佢哋近期連場報捷，過關唔奇。同市死敵車路士則抽到好籤，面對布拉格斯拉維亞，唔使問阿貴，主帥沙利要保住烏紗，梗係要力爭歐霸喇，藉此取得下屆歐聯入場券，因為順風順水的話，殺退弱旅斯拉維亞唔難，連埋4強同決賽，總共只需打多5場，值得留意係車仔打歐霸一直用基奧特等後備兵，仍然見關過關，若果去到最後階段用埋夏薩特，實力更強，相比起聯賽仲要對利物浦及曼聯，歐霸點都好打啲，所以我認為車仔會棄聯賽前4、重歐霸冠軍，佢哋今晚作客愛華頓，都係睇波算數。（Now 621周一凌晨零時30分直播）