傷兵成籮作客秘魯先求穩
周三早上南球盃首圈首回合激戰連場，等阿King同大家講講過關心水。其中秘魯球隊慕尼斯帕爾將會主場迎戰阿甲代表高隆，高隆一班前鋒近期齊齊啞火，進攻有阻滯，呢場作客都會睇定啲嚟踢，捧半場和比較穩陣。
（周三早上8時30分開賽）
喺阿甲聯賽排名倒數第3嘅高隆，今季整體表現令人失望，進入2019年情況都未見好轉，尤其一班前鋒狀態低迷，近6仗未贏過波之餘，仲只係靠12碼先入到2球。查實球隊傷兵問題都幾嚴重，除咗中場主力李安納度希利迪亞同費列斯拿有傷缺陣之外，近排仲有哥倫比亞前鋒摩尼路加入十字軍名單，未有隨隊前往秘魯，肯定進一步削弱原本已經疲弱嘅前場攻力。加上高隆出戰南球盃比賽初段都比較慢熱，近5仗南球盃半場全開半場和，呢場高隆隨時棄攻主守，留待次回合返主場再搏過，半場和係好路。
艾斯賓路拿「速食」新丁
同日仲有智甲嘅艾斯賓路拿主場鬥厄瓜多爾球隊穆蘇魯拿，穆蘇魯拿屬南球盃新丁，今季聯賽6戰贏得1場咁大把，無論級數定近況都差艾斯賓路拿一大截，加上艾軍近4仗全勝，主場出擊更有信心，主W博得過。
最後有玻利維亞球隊國民普托斯主場面對委內瑞拉代表蘇利亞，後者國家政局混亂，令球隊士氣都麻麻，不過國民普托斯踢親南球盃開局都比較保守，半場和值博。