德軍小鬼考牌
為期一周嘅國際賽檔期，今晚由德國對塞爾維亞嘅熱身賽揭開序幕。「日耳曼軍團」經過歐國聯恥辱降級後，主帥勒夫決心改革，今晚預計會由小將孭飛，喺大眾汽車球場迎戰當弗硬淨及具經驗嘅塞爾維亞，兩軍嚟緊都有歐國盃外圍賽硬仗要踢，熱身賽唔慌去盡，投注首選細盤！
（有線662及602台周四凌晨3時45分直播）
勒夫推行改革需時
德國喺歐國聯4戰不勝搞到降級後，領隊勒夫日前令人意外咁公布，國內班霸拜仁慕尼黑嘅3位重心球員曉姆斯、謝路美保定同湯馬士梅拿唔會再入選國家隊，同時徵召從未入選過嘅3位小將，包括RB萊比錫守將高路斯達文、哈化柏林守將歷卡斯史達克同雲達不來梅攻擊中場艾格史甸，更預言未來陣容會大幅年輕化，希望採用新陣式新球員，加快國家隊攻守節奏，今場熱身賽正好係呢班小將嘅考牌戰，不過陣容變化過大，新舊球員點都要時間建立默契，而且對備受壓力嘅勒夫嚟講，嚟緊星期日晚歐國盃外圍賽作客死敵荷蘭先至係「主菜」，今場志在試兵試陣，隨時點到即止。
塞爾維亞喺世盃後雖有拿斯達錫同米利禾積域等拒絕再為國效力，不過領隊卡斯迪積帶領一班經驗豐富戰將，喺歐國聯表現出色，6場賽事錄4勝2和不敗佳績，取得升班資格兼至少獲得歐國盃外圍賽附加賽席位，除隊長高拉洛夫同曼聯防中尼曼查馬迪夠級數外，中後場戰將絕大部分都喺5大聯賽效力，打慣硬仗，前線富咸射手阿歷山大米祖域同阿積士大紅人杜辛泰迪治亦當弗，計實力絕對唔易啃。
塞軍作客例縮
不過睇番歐國聯佢哋有個特點，就係作客全開細盤。即使遇上立陶宛、羅馬尼亞同黑山呢啲二線球隊，塞軍都只用單箭頭，相當保守。何況佢哋嚟緊歐國盃外圍賽亦要作客鬥葡萄牙，唔會過分消耗體力，今晚仍然會以穩為先。