簡拿華路掌帥頭炮
中國盃東道主中國今晚喺廣西南寧迎戰泰國，今場係中超廣州恒大教練簡拿華路兼任國足主帥第一擊，新人事新作風，簡拿華路選入唔少新臉孔，希望可以由師傅納比嘅「大齡國家隊」，換血變成一支有新鮮感嘅國家隊，國足對泰國嘅優勢係身高，今場應該會用高空轟炸，有8名廣州恒大子弟兵喺手嘅「大簡」，憑住對球員嘅熟悉，應該可以取得開門紅，中國讓1球要上盤。
（周四晚7時35分開賽）
簡拿華路喺武磊免役下，亦選擇唔揀肖智、郜林、于大寶，鋒線上揀咗呂文君、董學升、譚龍同韋世豪4人，雖然未知對泰國場上表現如何，但4人喺新一季中超已經開齋，「大簡」似乎都係以態選人，算係踏出新一步。
董學升擔正高空轟炸
此外，今次國足有8人來自廣州恒大，「大簡」唔使花太多時認識及適應其他新球員，有指新國足嘅操練方法，同廣州恒大相似，不過，內地傳媒估計，簡拿華路將會以華廈幸福嘅董學升擔任正選。
兩軍年頭亞洲盃交手，國足雖然反勝泰國2比1，但本來國足開局想打地面戰，點知就一直老鼠拉龜，最終要用高空轟炸先反勝，董學升為正中鋒，身體質素良好，簡帥將會利用佢1米88身高衝擊泰國防線，相信可以為佢帶嚟首場勝利，信國足可以贏泰國，捧上盤。