歐國外E組有「紅龍」威爾斯首度亮相，主場迎戰斯洛伐克。威爾斯日前「拍跳」收起王牌加里夫巴利同艾朗藍斯，擺明留力打今仗，「大聖爺」亦希望趁機證明自己必搏盡，「紅龍」小讓平半必捧上盤。
（有線662及602台周日晚10時直播）
威爾斯於上屆歐國盃殺入4強，令人喜出望外，全賴中後場囤重兵做好防守，並靠艾朗藍斯及「大聖爺」加里夫巴利打反擊，雖然戰術簡單但都幾有效，就算傑斯上年執教後略作微調，不過兩人依然係孭重飛，因此日前熱身賽贏千里達1比0，傑斯特登收起佢哋，留晒力打今場波。加里夫巴利近期喺皇馬備受批評，主帥施丹回巢後更有傳佢冇碇企，無論博留隊定轉會，「大聖爺」今仗都要踢爭氣波。斯洛伐克在首仗輕取匈牙利2粒，全因對手實力差不足為信，加上近2次交手「紅龍」贏晒，小讓平半信得過。
克羅地亞夠贏匈牙利
至於同組勁旅克羅地亞，夜少少則作客匈牙利。雖然克羅地亞自上年世盃奪得亞軍後，表現大跌Watt，喺之前歐國聯A4組慘遭降班，但始終有莫迪歷、拿傑迪錫、卡拉馬歷等助陣，上仗先失波下反勝阿塞拜疆2比1，表現唔算精彩，不過總算重拾信心。匈牙利上仗淨吞斯洛伐克2蛋，中場全面失勢，而咁蹺「格仔兵團」最強係中場，實搓到匈牙利一戙都冇，可恃質贏波締造2連勝。
（有線662及602台周一凌晨1時直播）