守優於攻Vs決心不敗
今晚歐洲國家盃外圍賽爆發超級大戰，C組荷蘭喺阿姆斯特丹告魯夫球場迎戰德國，荷蘭近況同對賽近績都佔絕對優勢，再有主場之利自然備受睇好，不過德軍今仗賠率堅硬淨，作客都企硬平手盤，黑柴相信佢哋力求不敗嘅決心更勝荷蘭，預期會係一場惡戰，建議冷敲3.3倍和波。
（有線662及602台、香港開電視77台周一凌晨3時45分直播）
荷蘭上周中啱啱喺歐國外輕鬆旗開得勝，佢哋去年歐洲國家聯賽兩度同德國交手都佔上風，去年10月又係喺呢個球場大勝德軍3蛋，繼而11月作客德國半場落後兩球劣勢下都可以扳平，心理上當然唔驚德國，球隊近3次主場賽事分別輕取德國、法國同白俄羅斯，全部都保持清白之身，防線一對中堅華基爾雲迪積克同馬菲斯迪歷特級數狀態都處於高峰，不過前線整體實力仍有瑕疵，效力里昂嘅迪比已經係最孭飛攻擊手，可惜拍檔昆斯普美斯同賴恩巴布都遠遠及唔上世界級，今晚要強攻實力決心兼備嘅德國，未必可以再攞到着數。
德軍推倒重來輸唔起
德國經歷世盃同歐國聯恥辱慘敗後，領隊勒夫宣布踢走3位拜仁老將，徹底推倒重來決心毋庸置疑，但太急於改變亦惹起傳媒同球迷強烈質疑，今場一旦輸波肯定又會惹嚟千夫所指。德軍上周中喺主場只能逼和塞爾維亞，但睇番過程確佔上風，該役以年輕球員掛帥，正選陣容只剩得門將紐亞一位2014世盃冠軍功臣，球隊行軍的確快速咗好多，但經驗不足搞到半場落後，下半場老大哥馬高列奧斯落場總算帶番起隊波，若非迪姆華拿痛失良機應可反勝，今晚仲有另一位老大哥卻奧斯蓄銳擔正，預期會有更進一步演出，佢哋計人腳級數唔會比荷蘭差，加上戰意鮮明，今晚再訪阿姆斯特丹幾大都唔想輸！基於同組另外3隊北愛爾蘭、愛沙尼亞同白俄羅斯實在太弱，荷德兩軍根本唔使擔心出線問題，呢場大戰和波係雙方都可以接受嘅賽果。