歐國外I組第2輪賽事，世盃季軍比利時作客鬥塞浦路斯。兩軍已經連續3個大賽外圍賽被編入同組，對上4次交鋒，比利時全部贏晒兼狂轟13球，級數明顯有差別，不過比利時近期後防表現唔算太穩陣，讓球主客和讓兩球太辣，轉捧2.5球大仲穩陣。
（有線603及604台周一凌晨3時45分直播）
繼上屆歐國外及2018世盃外後，比利時今次再喺歐國外跟塞浦路斯同組。兩軍首輪同樣旗開得勝，比起塞浦路斯大炒弱旅聖馬力諾5比0，比利時以3比1擊敗俄羅斯顯得較有說服力。比利時雖有唔少主力受傷，但一個夏薩特已叫對手後防疲於奔命，而且幾位邊緣國腳好似巴舒亞伊、泰利文斯及杜根夏薩特上場都有唔錯表現，攻力依然有保證，不過比利時近5場國際賽只有1場冇失波，其中歐國聯作客瑞士曾大敗2比5，門將泰拔高圖爾斯上場又「派膠」，要淨勝3球贏盤唔係咁易，既然今場大細中位數有2.5球，轉捧入球大更划算。
哈薩克俄羅斯吼半和
同組另一場比賽由哈薩克主場鬥俄羅斯。哈薩克首輪主場爆冷以3比0大炒蘇格蘭，士氣一流；相反俄羅斯作客除咗輸畀比利時，中場高路雲更領紅牌被逐，今場需坐波監，預計牌面較高嘅俄羅斯喺比賽初段都唔敢輕舉妄動，首選半場和。
（有線603及604台周日晚10時直播）