季軍戰砌烏茲別克
周一下午中國盃季軍戰，東道主中國繼續在廣西南寧主場迎戰烏茲別克。意大利主帥簡拿華路上仗首執國足帥印慘吞敗仗，呢場肯定不容再失，由於國足多位經驗攻擊手未有入選，其餘年輕鋒將未必有力迅速敲開烏軍大門，捧半場和好路。
（周一下午3時30分開賽）
老帥納比喺年初亞洲盃國足8強止步後讓出國足帥位，國足經歷近2個月群龍無首局面，今次中國盃開賽前不久，中國足協才委任廣州恒大嘅意大利主帥簡拿華路兼任國足主帥，佢點兵組軍備戰時間有限。「大簡」這次選人亦明顯有別往常，除咗近期喺西甲出盡風頭嘅武磊獲免役，于大寳同郜林兩位經驗前鋒今次都落選，選入多位年輕球員，大大削弱國足前場攻力。
主場近3交鋒全半和
「大簡」執起國足教鞭首戰就以0比1不敵泰國，只能角逐季軍戰，呢場面對球風硬朗嘅烏茲別克，簡帥昨日操練時對球員訓話提出較高要求，敦促他們比賽時要更集中精神及要有贏波飢渴感；翻查國足近3次主場面對烏茲別克半場都打和，深受意式防守影響嘅簡帥，開局都要求國足做好防守唔會亂攻，再追半場和。