新三叉戟勇不可當
周二淩晨歐國外A組重頭戲，黑山主場硬撼英格蘭。「三獅軍團」喺哈利卡尼、史達寧及查頓辛祖嘅「新三叉戟」帶領下勇不可當，今屆歐國外取得完美開局，呢場面對實力一般嘅黑山有力再下一城，英格蘭讓一球、球半，上盤好路。
（有線662及602台周二淩晨3時45分直播）
「三獅軍團」去年喺修夫基帶領下，於世盃捲起青春風暴，以年輕球員為核心成功打入4強，創下近年最佳成績，世盃後英軍走勢未有放慢嘅迹象，繼歐國聯力壓勁旅西班牙同世盃亞軍克羅地亞搶得A4組首名之後，上仗再喺歐國外首戰狂風掃落葉以5比0擊敗捷克，邁出進軍歐國盃決賽周重要第一步。其中上仗連中三元嘅史達寧門前把握力有明顯改善，已成為獨當一面嘅球星，配合年僅18歲嘅新星查頓辛祖，同能傳擅射嘅前鋒哈利卡尼，英格蘭絕對有足夠火力再全取3分。
黑山質庸祖維迪缺陣
相反歐國聯表現欠奉嘅黑山，最終只取得C4組第3名，錯失附加賽資格，想爭歐國盃決賽周入場券，就惟有喺外圍賽突圍，可惜頭號球星祖維迪長期缺陣，球隊平均個人質素又麻麻，上仗就畀保加利亞逼和1比1，呢場好難同氣勢正旺嘅英格蘭周旋，捧番上盤好過。