C朗甩完轆要出氣
衞冕嘅葡萄牙喺歐國外B組主場對塞爾維亞。基斯坦奴朗拿度（C朗）上仗回歸葡軍食白果，谷埋肚火要發洩，但塞爾維亞中前場猛將杜辛泰迪治及阿歷山大米祖域抖夠，仲有人氣新星盧卡祖域助陣堅猛火，今仗隨時合演入球騷，2.5球大盤有計。
（有線661及601台周二凌晨3時45分直播）
C朗喺世盃後主動申請唔踢歐國聯，蓄銳預備更重要嘅歐國外，點知上仗回歸即刻甩轆，主場悶和烏克蘭，C朗一向好勝，必當塞爾維亞沙包咁出氣，畢竟葡軍係上屆盟主，如果出唔到線都幾冇面，今仗實搶攻。
不過塞爾維亞亦非善男信女，上周中熱身賽收起中前場猛將杜辛泰迪治及阿歷山大米祖域，照樣打和德國1比1，今仗佢哋抖夠復出，攻擊力大增，尤其係杜辛泰迪治近況大勇，早前帶領阿積士喺歐聯16強淘汰皇馬，可見一斑。仲有今季喺法蘭克福士哥不斷嘅盧卡祖域，上仗對德國亦轟入自己喺國際賽嘅開齋波，信心爆棚，難怪連巴塞隆拿都想撬佢過檔，絕對唔怕同急於搶分嘅葡萄牙鬥攻，入球大有計。
烏克蘭食住盧森堡
同組盧森堡主場對烏克蘭，烏克蘭上仗頂住葡萄牙搶分成功表現唔錯，今仗造訪弱旅誓搶3分，加上近3次交手都贏3粒，捧讓球客勝。
（有線605台周二凌晨3時45分直播）