近4次對賽炮製21球
世盃冠軍法國喺H組第2輪迎戰冰島，兩軍首戰同樣贏波，冰島論實力當然遜法國一籌，不過近4次交手，冰島最少入到法國2粒，所有總入球都係4球或以上，入球大不容錯過。
（有線603及604台周二凌晨3時45分直播）
法國首戰以4比1作客擊敗摩爾多瓦，3大射手基沙文、基奧特及基利安麥巴比皆有士哥，保羅普巴亦都踢得好生，充滿世界盃王者風範，唔單止係實力同球技好，睇得出球員嗰種求勝心仲係好強，唔會話因為已經係世盃冠軍而減少咗對勝利嘅飢渴感。基奧特亦喺前日宣布，歐國盃決賽周後會退出國家隊，佢當然會喺外圍賽盡力，而且以最後捧盃為目標。
至於冰島上場亦以2比0打敗弱旅安道爾，寓賽於操，以最佳狀態迎接今戰。雙方上屆曾經喺歐國盃決賽周8強交鋒，當時有主場之利嘅法國以5比2淘汰冰島，而總計各項賽事在內，法國近4次對冰島合共出現21個士哥，總入球全開4球或以上，捧2.5球入球大最明智。
土耳其再擦「私房菜」
同組土耳其對摩爾多瓦，土耳其首戰2比0擊敗阿爾巴尼亞，如果法國同冰島今輪打和嘅話，土耳其今場贏波就可以做小組一哥。土耳其之前6次對摩爾多瓦贏5次，最少贏2球，再遇「私房菜」捧讓球主勝。
（有線603及604台周一凌晨1時直播）