默西賽德郡雙子孭飛
周三凌晨國際賽焦點戰，捷克主場鬥巴西。捷克上仗畀英格蘭拆骨慘敗收場，士氣跌落谷底，呢場對住有羅拔圖法明奴壓陣嘅森巴軍團，根本難以招架，睇好巴西主動搶攻，半場客勝唔好錯過。
（有線602及662台周三凌晨3時45分直播）
森巴軍團6月即將出戰喺自己主場舉辦嘅美洲國家盃，為咗可以喺本國球迷面前捧盃威番次，肯定要落多幾成力備戰，呢場面對捷克絕對唔會手軟。隊中球星尼馬呢次雖然因傷未有入選大軍，不過巴西前場依然有唔少進攻好手壓陣，除咗效力英超嘅默西賽德郡雙子羅拔圖法明奴同李察利臣之外，被譽為「新卡卡」嘅盧卡斯柏基達表現亦日漸成熟，有力擔起進攻重責。
捷克慘敗後信心跌谷底
捷克喺門神施治退出國家隊之後，陣容出現青黃不接嘅情況，羅馬前鋒柏德列舒希克同般尼射手馬迪維達等陣中主力實力麻麻，根本難以重拾黃金一代嘅光輝，上仗喺歐國盃外圍賽球隊就淨吞英格蘭5蛋，明顯出現信心危機，呢場主場出擊都難逃一劫，寧願捧巴西半場勝更佳。