周二傍晚麒麟盃大戰，日本主場迎戰玻利維亞。未能成功衛冕亞洲盃嘅「藍武士」，正積極備戰美洲國家盃，可惜領隊森保一似乎未揾到球隊最佳前場組合，鋒力欠佳，呢場對住進攻板斧都唔算多嘅玻利維亞，兩隊隨時上演一場悶戰，中位數2.5球入球細好路。
（有線602及662台周二晚6時30分直播）
年初同亞洲盃冠軍寶座擦身而過嘅「藍武士」，為咗備戰6月舉行嘅美洲盃，今次國際賽期特登揾嚟哥倫比亞同玻利維亞兩支南美球隊練兵，力爭喺賽事取得佳績。可惜上仗面對勁敵哥倫比亞，「藍武士」進攻明顯雷聲大雨點小，暴露出門前把握力欠奉嘅問題，加上重回國家隊嘅老將香川真司後備上陣表現平平，最終0比1輸波收場。前鋒乏力嘅情況如果冇改善，今仗面對整體實力較弱嘅玻利維亞，就算成功破蛋，都好難大勝對手。
玻利維亞近況低迷
玻利維亞陣中大部分球員都喺本土聯賽揾食，個人能力唔算標青，尤其球隊近期戰績低迷，近5仗取3和2負，其中有4次都係同亞洲球隊交手，只係入到2球，包括上仗0比1輸畀南韓，進攻板斧唔算多，呢場面對整體實力有番咁上下嘅日本，睇怕都係得個守字，寧願捧細盤。