蘇B坐正第1擊心雄
英超周六晚重燃戰火，曼市雙雄分途出擊，啱啱宣布蘇斯克查坐正嘅「紅魔鬼」曼聯喺奧脫福主場迎戰「大黃蜂」屈福特，屈福特依家喺聯賽無欲無求，加上近4次對紅魔鬼唔止全部輸晒，而且4次都係上半場已落後，博好分頭捧半場主勝。
（Now 621周六晚11時直播）
曼聯喺國際賽前雖然先喺聯賽輸畀阿仙奴跌落第5位，然後喺英足盃8強畀狼隊淘汰出局，不過並冇動搖球會對蘇斯克查嘅信心，日前球會正式宣布同「蘇B」簽約3年，呢場係佢坐正後首場比賽，加上之前2連敗，贏波決心有幾大相信唔使多講。早前因傷避戰國際賽嘅盧卡古及拉舒福特據悉有望復出，連格、安達靴里拉、安東尼馬迪爾及桑馬達對狼隊時亦已傷愈落場，陣容回復完整更添勝算。
屈福特對賽慣由頭輸到尾
屈福特依家喺聯賽榜排第8，落後第6位嘅車路士14分，加上又冇降班威脅，相信會集中火力應付下周末對狼隊嘅英足盃4強戰，更何況，「大黃蜂」今季聯賽9次對Big6球隊輸8次，當中作客曼城、利物浦、熱刺及阿仙奴全部輸晒，實力明顯差一班。睇番屈福特最近4次聯賽鬥曼聯全敗之餘，4次都係半場已落後輸到尾，如果嫌1.34倍主W太熱冇肉食，曼聯讓一球/球半又太多，不妨轉捧1.79倍半場主勝。
富咸遇曼城「細」成騎虎
另邊廂，曼城今晚會喺頭場作客弱旅富咸。曼城喺2019年10場英超贏9場，相反富咸11場聯賽輸10場，狀態、士氣差天共地，由於利物浦聽晚先喺主場鬥熱刺，落後2分兼少踢1場嘅曼城只要贏波，至少可做一日「1哥」，但考慮到曼城嚟緊仲要應付周中快車、英足盃4強及歐聯8強，無可避免要作出輪換或留力，加上富咸近4次聯賽主場對Big6球隊，除咗淨吞曼聯3蛋，其餘對利物浦、車路士及熱刺都係僅輸1比2，比數未算一面倒，大細中位數有3.5球寧願捧細。
（Now 621周六晚8時30分直播）