爭前4搏埋呢段
今晚英超頭場好戲碼，倫敦勁旅車路士作客鬥卡迪夫城。「車仔」上輪聯賽輸畀「拖肥」愛華頓後，爭聯賽前4形勢陷入被動，今勻對住護級水深火熱嘅卡迪夫城，喺「夏世三」夏薩特帶領下，呢3分可謂志在必得；卡迪夫城上場贏波止血，但近4仗有3次半場落後，「車仔」1.8倍半場客勝咪走寶。
（Now 621周日晚9時05分直播）
「車仔」近兩輪聯賽先賽和狼隊，之後更輸畀愛華頓，即時唔見5分，現時只以57分排第6位，落後第4嘅阿仙奴3分（未計尋晚賽事），想爭得來季歐聯席位絕對要踩油搏埋呢段。值得慶幸係一班主力喺國際賽期都好爭氣，除夏薩特代表比利時兩戰入3球脚風順到冇朋友之外，18歲英格蘭小將赫臣奧杜爾首次代表「三獅軍團」上陣，表現亦令人眼前一亮，狀態咁弗，主帥沙利臨場調兵遣將又多一個選擇。
卡城遇強頂唔到半場
排第18位嘅卡迪夫城護級形勢凶險，不過同前面幾隊得幾分差距，護級仲有價講，可惜「卡城」今季「遇強即屈」，成功搶分對手多數係同級球隊，相比之下，「卡城」近7次聯賽鬥Big 6全部輸晒，其中5次半場就已經落後，今場面對急求反彈嘅車路士，睇怕主場都幫唔到手，半場客勝值博。