國際賽完結後英超又再展開廝殺，今晚重頭戲「紅軍」利物浦主場對熱刺，關乎爭標及前4之爭，兩隊肯定肉緊。利物浦近況雖然較佳，但盤口讓到半一低水唔算吸引，既然熱刺近期防線甩漏多，兩隊着火射手「雙尼」同時又要爭金靴獎，樂比建議向1.62倍嘅2.5球大盤埋手。
（Now 621周日晚11時30分直播）
利物浦目前與曼城鬥得難分難解，淨番最後7輪除咗要全力搶分之外，仲要盡量爭取入球，皆因英超同分之後會計得失球，以目前咬得咁緊嘅形勢睇，最後衝線要靠「影相」絕對唔奇。利物浦今晚當然秤先啲，自1月足總盃不敵狼隊出局後，各項賽事已12場不敗，歐聯亦殺退拜仁闖入8強，即使主將穆罕默德沙拿狀態滑落，已經連續7場食白果，但拍擋沙迪奧文尼弗到漏，尤其係主場更如魚得水，近6次喺晏菲路主場都有進帳，加埋入咗8粒，咪忘記「全能後衞」華基爾雲迪積克助攻經常有貢獻，「紅軍」要入波可謂多多瓣數。
熱刺嚟到季尾跌晒Watt，主因兵源薄弱，多線作戰下自然受影響。睇番佢哋近期作客不敢恭維，先後輸畀修咸頓、般尼及水晶宮等中下游球隊，各項賽事6場作客輸5次，足足失10球之多，今場仲要冇埋奧里亞、艾歷迪亞及哈利雲克斯等中後場主力，你話唔擔心就假。
文尼卡尼爭金靴必肉緊
不過熱刺入球能力始終唔弱，前鋒哈利卡尼有名你叫「Harry claim」，聯賽有冇冠軍佢未必在意，但個人榮辱就一定行先。佢同文尼現時同以17球排射手榜第2，肯定加多兩錢肉緊，睇番哈利卡尼近12場賽事入11球，同文尼一樣咁弗，淨係兩大射手今場都夠開大。