周一凌晨西甲壓軸戰，皇家馬德里主場鬥侯爾斯卡。皇馬功勳主帥施丹回歸後撥亂反正，不過季後佢必重建球隊，各球員為免被清洗，肯定加多幾錢肉緊，遇「魚腩」侯爾斯卡正好畀機會佢哋博表現，讓球主客和即使主隊讓兩球，照捧讓球主勝。
（Now 632周一凌晨2時45分直播）
皇馬今季無論係洛佩特吉或蘇拿利帶領下，表現都令球迷失望，搞到「銀河艦隊」喺各項賽事多出現潰敗慘狀，除咗西盃同歐聯先後遭淘汰，聯賽亦畀死敵巴塞大幅拋離，爭冠機會微乎其微。施丹選擇喺球隊最黑暗時期回歸，短期內絕對可以幫隊波注入強心針，手握重金同大權嘅佢，為重振昔日光輝，季尾肯定多搞作，意味隊內難免會有人遭清洗。為保飯碗，一班球員落場點會錫身，其中前朝「邊緣人」艾斯高及不得球迷歡心嘅加里夫巴利，上輪施丹回歸首戰即有波入，今場有望延續好腳頭。
侯爾斯卡殘陣冇得救
今季首次升上西甲嘅侯爾斯卡位列榜尾，護級形勢非常嚴峻，加上雷仙奴、卡路士阿卡普同柏保路恩素亞幾位後防大將全部有傷提早收咧，令實力大打折扣，根本難同星光熠熠嘅皇馬周旋，作客預咗放低3分，只係睇下輸幾多粒，讓球主勝屬好路之選。