國際賽窒住染埋FIFA病毒
周二凌晨英超獨腳戲，阿仙奴主場鬥紐卡素。兵工廠喺艾美利帶領下表現漸入佳境，不過經過突如其來嘅國際賽期，磨合多時嘅默契難免會被打亂，難炒近期表現唔錯嘅「喜鵲」，阿仙奴讓球1球、球半捧下盤。
（Now 621周二凌晨3時直播）
兵工廠繼早前聯賽擊敗死敵曼聯，為紅魔新領隊蘇斯克查贈興，送上挪威人接手曼聯後聯賽首敗後，再喺歐霸16強次回合上演大逆轉，淘汰雷恩晉級，一班搶手交出連場好戲，證明領隊艾美利漸掌握取勝之道，可惜國際賽期令聯賽暫時休戰，搞到阿仙奴要抖成半個月至比賽，氣勢被沖淡，而且艾朗藍斯同格列沙加兩位中場大將為國家隊效力期間齊齊染上FIFA病毒整親，呢場就算踢到都未必可以保證最佳狀態，加上盧卡斯托拉拿仲坐緊波監，艾美利要揾番贏波方程式真係要諗諗計。
紐卡素新兵有料到
廠長想全取3分，呢場就要問過佢嘅西班牙同鄉賓尼迪斯，賓帥縱橫英超多年，雖然率領嘅「喜鵲」整體實力唔算標青，不過貴為「戰術大師」，班波有佢睇住表現衰極有譜，今季5次面對倫敦嘅Big6球隊，紐卡素全部都只係輸1球咁大把。另外新兵米基爾阿米朗表現同樣值得留意，呢位巴拉圭中場雖然身材輸蝕，不過靠球技同意識搭夠，已經證明自己有力喺英超立足，有佢搭住狀態幾弗嘅前鋒荷西朗頓，呢場「喜鵲」隨時會有驚喜表現。