留力周日足總盃決賽
英超加開快車，周三凌晨重頭戲曼聯作客狼隊。曼聯早前被狼隊喺英足盃8強淘汰出局，不過此一時、彼一時，曼聯領隊蘇斯克查終獲正式合約，如今「紅魔」上下士氣正盛，最重要嘅係，狼隊周日要出戰英足盃4強，全副心機放晒嗰場比賽，肯定會留力，今晚送個順水人情畀蘇B做上任賀禮又何妨，曼聯讓半一上盤抵玩。
（Now 621周三凌晨2時45分直播 ）
其實呢場波雙方目標都好明確，曼聯要爭前4，狼隊就聯賽冇嘢好爭，以佢哋今季投資，現時聯賽排第7絕對收貨，足總盃入4強就幾大都爭盃，爆冷捧盃就真係一大成就，所以今場英超，最重要係齊齊整整過完90分鐘，留力周日場盃賽盡砌。
曼聯宣布蘇斯克查「坐正」後，即一洗早前頹風，上場聯賽以2比1擊敗屈福特，「紅魔」現時同熱刺同得61分，領先阿仙奴及車路士1分，爭入前4仍未可鬆懈。贏屈福特嗰場拉舒福特同安東尼馬迪爾各建一功，2名射手入球數字達到10球，連同保羅普巴(11球)及盧卡古(12球)，曼聯同時有4名球員入10球或以上，上次曼聯「多點開花」已經係1995至96年球季，當時係簡東拿、傑斯、高爾同史高斯。
蘇B領曼聯作客7戰6勝
蘇B輪換得宜，各人得到充份休息之餘，又有足夠上陣時間，球隊相處融洽，肯為佢搏命，所以唔需要擔心作客，單計聯賽，蘇斯克查領軍7場作客只曾不敵阿仙奴，其餘6場全勝，對住狼隊都唔怕。
狼隊今季遇強愈強，聯賽加盃賽11次鬥Big6共取得4勝4和3負，不過狼隊本周日要與屈福特於英足盃4強交鋒爭入決賽，為免增添傷兵或消耗過多，就算領隊紐奴唔採取輪換，落場球員亦難免有顧慮，上場聯賽便以0比2不敵護級分子般尼，今次面對急切搶分嘅曼聯，料凶多吉少。