頭號射手唔准倒戈
周六凌晨英超獨腳戲，修咸頓主場挑戰利物浦。隨住榜首爭持進入白熱化階段，利物浦想喺曼城手上搶番1哥席位，真係1分都唔少得，好彩「紅軍」攻守兩端都有猛將壓陣，呢場面對實力差幾班嘅「聖人」全取3分話咁易，利物浦讓一球、球半唔算多，一於捧上盤。
（Now 621台周六凌晨3時直播）
英超經過周中補賽連場激戰後，利物浦暫時僅以1分之差，落後榜首嘅曼城屈居次席，喺充滿變數嘅英超賽場，冠軍寶座最終誰屬依然好難定斷。上仗「紅軍」就再度成功跨越難關，以2比1擊敗Big 6勁敵熱刺，取得爭冠路上重要勝仗，其中穆罕默德沙拿嘅表現都絕對抵讚，佢喺上仗臨完場前嘅頭槌攻門，導致熱刺球員自擺烏龍，為「紅軍」博到致勝球，絕對稱得上係贏波功臣。
利物浦有前有後撐上盤
埃及球王近期陷入入球荒，令唔少人質疑佢嘅狀態，仲批評佢今季入球效率亦遠不及上季，不過睇真啲，佢嘅兩位前場好拍檔羅拔圖法明奴同沙迪奧文尼，今季成功分擔埃及人嘅入波重責，對保持利物浦穩定表現絕對係好事，況且穆罕默德沙拿至今斬獲17個聯賽入波，成績絕對唔曳。況且對手「聖人」前場鋒力麻麻，除咗頭號射手丹尼艾格斯係利物浦借將，因迴避條款唔可以上陣之外，查理柯士甸今季都只係入得2球，進攻明顯冇料到，呢場要對住倒戈相向嘅「紅軍」防線定海神針華基爾雲迪積克肯定冇運行，一於捧利物浦上盤。