今晚直播德甲打吡雙響炮，重頭戲係「國家打吡」拜仁慕尼黑對多蒙特嘅德甲王者戰，大戰當前，「球愛Live Party」當然唔少得，除咗Oscar同蘇雞做評述，兩軍球迷會派出代表互片之外，仲有Gillian同Ursula兩大索女性感上陣，陪大家睇波一路玩，雙重娛樂，只此一家！
（on.cc東網睇體台周日凌晨零時30分直播）
第100次國家打吡做大騷
拜仁對多蒙特唔只係榜首戰，亦係史上第100次國家打吡，拜仁歷來對賽攞到45勝29和25負較佳戰績，不過目前喺聯賽榜就落後多蒙特兩分，踢埋今仗聯賽只剩低6輪，已經冇乜空間追，若然今場和波會繼續處下風，輸波更加係大災難，喺安聯球場必然開波即搶攻求勝。佢哋啱啱喺德國盃人少打人多下5比4反勝海登咸殺入4強，箭頭羅拔利雲度夫斯基又省兩粒，現時佢以19個入球高踞德甲射手榜首，另外喺歐聯同德國盃分別入咗8球同3球，總入球達到30大關，今晚王者戰當然要加多兩錢肉緊搶士哥。
多蒙特後勁強敲主和
多蒙特上輪靠柏高艾卡沙補時兩個入波，擊退禾夫斯堡進佔榜首，今晚出師安聯球場，後防主力艾度迪亞路同阿舒拉夫因傷缺陣，防線削弱，好在靈魂馬高列奧斯復出領軍攻堅，佢哋王牌射手柏高艾卡沙雖然只有16個德甲入球排射手榜次席，但佢上陣時間相當少，今季德甲只踢咗683分鐘，即係平均每42分鐘就入到1球，效率遠勝平均每122分鐘至省1粒嘅羅拔仔，何況多蒙特係德甲後勁王，今季66個入球當中，有21個係喺最後15分鐘取得，今場建議先捧中位數3.5球大盤，再小敲有15倍嘅「半全場」主和博大霧。