嚟緊又歐聯最緊要識留
今晚西甲激爆榜首戰，「1哥」巴塞隆拿主場迎擊「2哥」馬德里體育會。巴塞依家聯賽優勢明顯，為留力嚟緊下周中歐聯8強鬥曼聯，今場首要目標保住唔輸，唔使去得太盡；馬體會踢法守優於攻，加上箭頭迪亞高哥斯達及艾華路莫拉達缺陣，鋒力更弱，捧中位數2.5球入球細啱數。
（Now 632周日凌晨2時45分直播）
力爭衞冕嘅巴塞，今季基本上冇點受過大考驗，暫時以8分領先次席馬體會。不過「地上最強」要兼顧歐聯戰線，近期惡戰連場，球員點留放相當緊要。周中快車辛苦逼和維拉利爾4比4一役，本來想畀隊長美斯抖抖，先做後備，但最終都係換佢出嚟救命，真係冇佢唔掂搞到佢攰爆，加上下周歐聯8強首回合又要遠征英倫鬥曼聯，今晚對住馬體會冇必要去盡贏波。上仗美斯再次憑罰球建功，狀態唔曳，可惜翼鋒奧士文尼迪比利未好番，拍檔蘇亞雷斯亦難復當年勇，單靠美斯單打獨鬥，面對防守向來硬淨嘅馬體會，巴塞要入波確實有啲難度。
「雙達」缺陣馬體會難入波
馬體會主帥施蒙尼帶隊多年，建立一套打不死鐵血風格，今季硬朗依然，以門神奧比歷、烏拉圭雙雄高甸及荷西基文尼斯為首嘅銅牆鐵壁，僅失19球係聯賽防守最強一隊，惟現時落後巴塞太多，想後上封王今晚必定要盡擸3分。可惜迪亞高哥斯達早前復出後又傷過，今場肯定無緣披甲，另一箭頭艾華路莫拉達亦因傷倦勤，單靠法國射手基沙文，好難惡得出樣。
翻查往績，兩軍近5次交鋒屬高手過招，合共只炮製10個士哥咁大把，當中有4次總入球開2球或以下，相信今場唔會有突破性發展，中位數2.5球入球細相當好路。