母校師弟撐場打氣
今晚喺溫布萊球場上演嘅英格蘭足總盃4強戰，由「藍月亮」曼城硬撼白禮頓。曼城力爭4冠王火力全開，白禮頓今季鬥Big 6表現無懼色，一場過賽事必想偷雞，鬥攻格局，入球大（3.5球）乃不二之選。
（周日凌晨零時30分開賽，馬會網上文字直播）
曼城喺2月尾擊敗車路士捧走英聯盃，繼續瞄準聯賽、歐聯及英足盃3項錦標，佢哋近期於各項賽事加埋連贏7場，上圈英足盃8強作客英冠球隊史雲斯雖一度落後0比2，但喺火力全開下最終反勝3比2，今屆4場英足盃共轟19粒，全部開5球或以上。就算射手阿古路未好番，仲有史達寧、利萊辛尼、加比爾捷西斯擔大旗，有本錢繼續以攻代守，史達寧更買咗550張飛送畀母校Ark Elvin嘅學生，連交通費都搞掂埋，有師弟打氣隨時更落力。
白禮頓英足盃入到波
白禮頓喺周中聯賽慘吞車路士3蛋，今季9次鬥Big 6只得1勝1和7負，但7次輸波有5次僅輸1粒，唔係任人魚肉。況且白禮頓今屆英足盃5場，法定時間只得1場食白果，其餘4場入8球及失5球，殺入4強可謂交足貨，今場對曼城拚輸嚟打，隨時有驚喜。曼城主W太熱冇肉食，既然兩軍都攻得，轉捧3.5球嘅大盤更上算。