東網頭場仲會直播埋南方打吡，史特加主場對紐倫堡上演護級大戰，今場我哋安排咗英語旁述，史特加目前以20分排尾3，落後尾4嘅奧格斯堡5分，領先今場對手尾2嘅紐倫堡亦有4分，但以兩軍近期表現同氣勢，再睇埋陣容完整性，紐倫堡絕對唔比史特加差，既然今場和波對雙方都冇好處，黑柴建議再博冷，敲4.15倍紐倫堡客W。
（on.cc東網睇體台周六晚9時30分直播）
紐倫堡自從由舒賀馬斯做看守教練後表現大有進步，連仗踢出嚴密防守組織同強橫鬥志，只係一直當黑同遇上強敵至僅敗，到上輪主場對奧格斯堡終於一吐烏氣，大勝3球令護級重現曙光，今晚若能一舉擊敗護級對手，就好有希望爭取護級附加賽資格，幾大都會搏盡佢。史特加平均人腳名氣佔優，但陣上表現就冇紐倫堡咁頑強，上輪吞法蘭克福3蛋之餘，仲有中場大將卡斯特羅同隊長根拿傷出，今仗無緣上陣，佢哋近12場聯賽只贏過包尾嘅漢諾威，今晚未必啃得落紐倫堡呢舊豬頭骨。