防線唔齊人 場場失波
英超前四爭持激烈，隨着同市宿敵熱刺輪空，阿仙奴本周有機會登上今季最高排名，暫時過吓「3哥」癮，不過理想與現實常有落差，兵工廠今晚作客愛華頓陣容不整，加上擺脫唔到作客必失波定律，樂比建議今場玩大盤穩陣，中位數2.5/3球有1.8倍絕對吸引。
（now 621周日晚9時05分直播）
英超歐聯席位得4個，但就有6隊爭，所以去到呢一刻即使聯賽只係剩番5至7輪，形勢仲未明朗化，唔好忘記今屆歐聯歐霸成績，都會影響到歐聯席位分配，如果咁蹺英超球隊同時奪得歐聯及歐霸，而以上球隊又未能奪得英超前四嘅話，最終聯賽第4名都冇得參加來季歐聯，因為歐洲足協早已表明，英超嘅歐聯席位最多只有5個，如遇到此情況下聯賽第4亦只能忍痛割愛。
言歸正傳，今場波照計力爭上游嘅阿仙奴動力就一定大啲，畢竟排第10嘅愛華頓季尾亦有權打風流波，論近況阿仙奴亦真係好，聯賽近6仗5勝1和，當中主場殺退曼聯亦有說服力，不過阿仙奴今季始終擺脫唔到防線不穩嘅陋習，聯賽作客踢咗14仗場場都有失波，係英超唯一一隊作客冇保持過清白身球隊，當中有11場總入球3球或以上，所以今場玩大盤絕對好過玩盤。事實上阿仙奴今仗陣容不整，除今季表現突出嘅防中盧卡斯托拉拿繼續停賽，格列沙加及哥斯尼又有傷，上陣機會亦唔樂觀，冇咗呢幾位中後場大將，令原本已不穩嘅阿仙奴防線更添幾分隱憂。
對愛華頓特別多波入
至於愛華頓今季火力亦得到提升，現時聯賽入45球已多過上季，連班納特安尼斯奧上仗都開齋，加埋全季大勇嘅李察利臣、基菲爾施古臣同卡維特利雲，要喺脆弱嘅阿仙奴防線身上取得入球並唔難。值得留意係呢個對賽特別多波入，阿仙奴射入過愛華頓大門107次，係英超史上兩支球隊對賽嘅最高紀錄，而上季交手阿仙奴分別大勝5比1及5比2亦令人津津樂道，今場隨時再出現大量入球。