由於嚟緊周中展開歐聯8強首回合，參賽球隊已喺上周六或之前打咗本土聯賽，因此今晚賽事戲碼麻麻，不如講講利物浦嘅埃及王子穆罕默德沙拿。
之前圍繞沙拿嘅話題，離唔開佢深陷多場入球荒，呢位上季英超金靴得主，心急破荒反而變得堅獨食，忽然成為「紅軍」負累。不過大家唔諗番轉頭，利物浦直到依家仍喺聯賽繼續咬住曼城唔放，冠軍夢猶在，與季初沙拿單天保至尊、引領球隊連場報捷有關，但成季流流長，球員受傷、狀態起伏少不免，而且球迷忽略咗沙拿除咗入波外，佢喺場上嘅牽制作用亦好重要，昨晨贏修咸頓3比1之役，佢用靚波打破入球荒，有助重拾信心。
事實上，利物浦絕非完美球隊，入波過於倚賴「埃及文明」鋒線，中場球員入波特別少。我哋行內人都睇到，主帥高普又點會唔知，高普嘅優勝之處，就係靠自己嘅激情及人格魅力，讓眾將付出百分之二百為佢賣命，呢位德國主帥唔會因球員一兩場失準而放棄咁短視，從沙拿喺入球荒期間持續上陣，顯出高普用人不疑嘅一面。
金句
誰說埃及王子係紅軍負累，高普場場用當然知人善任