沙拿返晒嚟進攻板斧多
周三凌晨歐聯8強首回合，利物浦主場同波圖重演上季歐聯16強戲碼。「紅軍」近期火力全開，穆罕默德沙拿重拾射門鞋，其餘隊友都頻頻入波，加上利物浦主場出戰歐聯不嬲搶韁，呢場肯定希望乘主場之利，喺開波初段爭取完美開局，半場主勝好路。
（myTV Gold800、Now 644、有線602及662台周三凌晨3時直播）
利物浦早前雖然有球星穆罕默德沙拿狀態陷入低潮，不過球隊依然可以喺近7仗取6勝1和佳績，皆因有另一王牌沙迪奧文尼挺身而出，呢位塞內加爾前鋒喺上月5場賽事斬獲5球，當中就包括喺歐聯16強次回合同拜仁慕尼黑嘅關鍵戰中，個人梅開二度成為球隊晉級功臣。好消息係埃及球王穆罕默德沙拿上仗聯賽打破入球荒，令「紅軍」進攻板斧又多幾瓣，呢場主場出擊要搶頭威話咁易。
波圖防線兩大將停賽
波圖啱啱同西班牙老門神卡斯拿斯續約，不過呢場就有後防核心比比，同中場大將赫達靴里拉齊齊坐波監，防線實力大打折扣，上賽季歐聯16強波圖就曾經同利物浦交手，結果佢哋首回合就慘吞5蛋，慘敗陰影相信到依家都仲纏繞住唔少波圖球員。況且利物浦喺自己地頭出戰歐聯近6仗取5勝1和，其中5次半場就取得領先優勢，呢場乘晏菲路球場氣勢，「紅軍」隨時於比賽初段就大開殺戒，半場主勝捧得過。