周三凌晨歐聯8強首回合爆發英超內訌，由熱刺主場硬撼曼城。曼城擅於先發制人，鋒線如史達寧、利萊辛尼均狀態大勇，射手阿古路更有機會復出，如虎添翼，加上近年交手曼城食住熱刺，1.68倍客W熱得有道理。
（myTV Gold303、Now 643、有線656及616周三凌晨3時直播）
剛搬進新主場嘅熱刺，「新屋」首騷輕取水晶宮2比0，略有沖喜作用，但近7場僅得2勝1和4負，氣勢回落，呢7場就喺哈利卡尼傷愈之後嘅成績，英國傳媒統計，呢7場哈利入4球，但就限制咗另一名攻擊球員孫興民發揮，「哈神」養傷時，孫興民4場入4球，而且熱刺呢4場贏晒，但哈利卡尼復出後，呢名南韓國腳上陣7場只係喺上仗入過1球。領隊普捷天奴如何適當利用2人，將會影響到球隊整體發揮，但似乎佢仲未搵到兩全其美嘅方法。
至於熱刺所謂球場沖喜，曼城中場奇雲迪布尼則表示，喺熱刺新主場踢波，其實冇乜唔同：「個個人都喺度講新球場，好似好特別咁，其實隊隊波都有主場，隊隊波都有球迷。佢哋（熱刺球迷）可能會刺激啲，不過對我嚟講，喺溫布萊踢有8萬球迷，喺熱刺新球場踢有6萬2球迷，分別真係唔大囉！」
近4對賽曼城全勝
劍指4冠王嘅曼城氣勢如虹，近23戰錄得21場勝仗，如果計埋聯賽盃決賽加時後互射12碼擊敗車仔捧盃，實際上只係輸過1場，幾近無敵。曼城翼鋒史達寧及利萊辛尼今季士哥不斷，連同射手阿古路有機會趕及復出，3人包辦「藍月亮」今屆歐聯26球中嘅12球，火力全開而且曼城近4次對住熱刺全勝，包括最近2場作客，心理上佔優，相信首回合可以搞掂熱刺，球隊可養精蓄銳衝4冠。