蘇B蜜月期過跌晒Watt
今晚歐聯8強首回合上演夢幻對決，曼聯主場火併巴塞隆拿。紅魔主帥蘇斯克查與球隊蜜月期已過，表現明顯跌Watt，而且巴塞近年歐聯造訪英超未驚過，仲有「英超頭號殺手」美斯壓陣，曼聯真係凶多吉少，巴塞讓平半，一於捧上盤。
（myTV Gold 303、Now 643、有線656及616台周四凌晨3時直播）
曼聯上年年尾怒炒摩連奴，委任蘇斯克查為看守領隊後連場報捷，包括在歐聯16強首回合主場輸0比2下，作客竟反勝巴黎聖日耳門3比1，憑較多作客入球奇迹晉級，令「蘇B」終獲坐正。不過，紅魔之後明顯跌Watt，近4場輸咗3場，包括喺聯賽及英格蘭足總盃8強兩度不敵狼隊，王牌保羅普巴近期冇晒料到，睇嚟新帥效應已過。除此之外，門神迪基亞、中場桑馬達及安達靴里拉等續約問題至今仍未解決，其中桑馬達更獲今場對手巴塞青睞，雖然佢話明唔會理咁多，但對軍心點都有影響。
美斯係英超頭號殺手
另邊廂，巴塞愈嚟愈弗，近9場豪取8勝1和佳績，包括喺歐聯16強以5比1淘汰里昂。球王美斯更係弗到冇朋友，近7場狂轟10球，呢位隊長之前30次鬥英超球隊，總共攻入22粒，其中喺2009及2011年歐聯決賽兩鬥曼聯都有士哥，「英超頭號殺手」並非浪得虛名。加上巴塞近6次喺歐聯作客英超球隊，取得4勝1和1負，明顯格食格，兩軍狀態一高一低，日前「蘇B」去西班牙吼路，睇完巴塞贏馬體會場波苦瓜乾咁嘅樣，似乎冇乜計，巴塞只讓平半，寧買當頭起，一於撐上盤。