阿積士誓刮青春風暴力抗意甲「1哥」祖雲達斯。以杜辛泰迪治及法蘭基迪莊為首嘅阿積士，在16強淘汰衞冕嘅皇家馬德里，過程極具說服力，祖記雖然有王牌基斯坦奴朗拿度傷愈，但匆匆復出狀態成疑，阿積士挾今屆歐聯14戰僅1敗之勢有力一戰，主場受讓必捧讓球主勝。
（myTV Gold 800、now644、有線662及602台周四凌晨3時直播）
沉睡多時嘅荷蘭老牌勁旅阿積士，16強首回合主場輸1比2嘅劣勢之下，喺次回合作客大勝近3屆歐聯盟主皇馬4比1，兩回合計反勝5比3晉級，相隔16年再度殺入歐聯8強。阿積士陣中有不少荷蘭國腳，法蘭基迪莊、馬菲斯迪歷特、雲迪碧克、戴利白蘭特等，法蘭基迪莊只得21歲，1999年8月出世嘅馬菲斯迪歷特未足20歲，喺呢班新星崛起之下，配合經驗豐富嘅中場杜辛泰迪治，阿積士攻力幾得人驚。
阿積士聯賽29戰已經射入100球，歐聯連埋外圍賽，14戰亦射入29球，只有1場入唔到波，平均每場入超過2球，亦令佢哋今屆歐聯戰績累積14戰8勝5和1負，以今場盤路計，主場受讓真係好抵。
祖記C朗狀態成疑
祖雲達斯雖於聯賽一放絕塵，但喺16強大演帽子戲法踢馬體會出局嘅王牌C朗，早前喺國際賽受傷，一直都未上過陣，儘管康復進度良好，今場好大機會趕及候命，不過匆匆復出狀態難有保證，對進攻影響甚大。況且今場只係首回合，祖記只要唔輸都有優勢，唔會太過進取。